(ر سم قد يم ع الحيط ) مهداة الى شاعر العا مية الجميل ) ا بر ا هيم حا مد
..............................................
..................................
زغاريط
وكهارب ماليه الشارع
وغناوي ومزيكا وتخبيط
وما فيش ف ايديه
غير آخر الليل اللي اتبقى من المشاوير
وأجنده ماليها بأحزاني
وبحلم عبيط
و طلعت سلالم بيتنا اللي عبا ره عن أوضتين فوق بعض
كان سلم ضيق جدآ جدآ
خادني لفوق
ففردت الجسم التعبان
في سريري المليان بالأحلام
غمضت عنيه
كان نفسي آنام
الصبح اما يجيني
ح اضطر انزل للشارع تاني
نفس وشوش الناس في الحته
في الشغل
ع القهوه
نفس آلاف الأيام
زادت أصوات المزيكا واشتد التخبيط
فشغلت دماغي برسم قديم ع الحيط
كان لحبيبة عمري اللي بقالي سنين بحلم بيها
كان لعروسة الليله
كان داخل ع الرسم رسوم تانيه وشخابيط
لكن كان باين ليّ عنيها وضفايرها
وايدين ع التخته وطباشيره ف صوابعها الدافيه
وصوت (الست) ف قلب الليل اللي سهرته وانا ببني العمدان اللي ح تصنع لينا البيت
اتمنيت واتمنيت واتمنيت
ياه ع الحزن اللي ماسكني
ياه ع الضحك اللي مسكني
حتى الرسم اللي فاضللي
أنا شوفته بيسقط مع جير الحيطه الهلكان
وعشان ما أحسش أكتر بالغثيان
فردت غطايا عليه
وحاولت أنام
....................................................شعر/ أ يمن سراج الدين
ليست هناك تعليقات:
إرسال تعليق